Category: Naat

خلد مری ، صرف اُس کی تمنا ، صلی اللہ علیہ وسلم
وہ مرا سدرہ وہ مرا ظوبیٰ صلی اللہ علیہ وسلم

غار حرا میں وہ تنہا تھا ، تنہائی میں بھی یکتا تھا
چار طرف ذکر اقرا تھا ، صلی اللہ علیہ وسلم

قبل اُس کے مسجود تھے کتنے ، فرعون و نمرود تھے کتنے
کتنے بتوں کو اُس نے توڑا صلی اللہ علیہ وسلم

اُس کا جلال ہے بحرو بر میں اُس کا جمال ہے کوہ قمرو میں
اُس کی گرفت میں عالم اشیا ، صلی اللہ علیہ وسلم

وہ جو بظاہر خاک نشیں تھا ، لیکن جو افلاک نشیں تھا
میں ہوں ندیم غلام اُسی کا ، صلی اللہ علیہ وسلم

اس قدر کون محبت کا صلہ دیتا ہے
اُس کا بندہ ہوں جو بندے کو خدا دیتا ہے

جب اترتی ہے مری روح میں عظمت اُس کی
مجھ کو مسجود ملائک کا بنا دیتا ہے

رہنمائی کے یہ تیور ہیں کہ مجھ میں بس کر
وہ مجھے میرے ہی جوہر کا پتا دیتا ہے

اُس کے ارشاد سے مجھ پر مرے اسرار کھلے
کہ وہ ہر لفظ میں آئینہ دیکھا دیتا ہے

ظلمتِ دہر میں جب بھی میں پکاروں اُس کو
وہ میرے قلب کی قندیل جلا دیتا ہے

اُس کی رحمت کی بھلا آخری حد کیا ہوگی
دوست کی طرح جو دشمن کو دعا دیتا ہے

وہی نمٹے گا مری فکر کے سناٹوں سے
بت کدوں کو جو اذانوں سے بسا دیتا ہے

وہی سرسبز کرے گا مرے ویرانوں کو
آندھیوں کو بھی جو کردار صبا دیتا ہے

قدم اٹھتے ہیں مرے ، جانب یثرب جب بھی
اک فرشتہ مجھے شہیر کی ہوا دیتا ہے

فن کی تخلیق کے لمحوں میں تصور اُس کا
روشنی میرے خیالوں میں ملا دیتا ہے

ؔقصر و ایواں سے گزر جاتا ہے چپ چاپ ندیم
در محمدؐ کا جب آئے تو صدا دیتا ہے

دل کے حرا میں اپنے خدا سے تیرے سوا کچھ بھی تو نہ مانگا
تو مرا اول تو مرا آخر تو مرا ملجا تو مراماویٰ

بعد خدا اِک تو ہی سہارا گِھر گیا میں تنہا بے چارا
چار طرف تاریخ کا جنگل تاک میں اپنے گھات میں اعدا

کتنے صحیفے میں نے کھنگا لے نصف اندھیرے نصف اُجالے
تو ہی حقیقت تو ہی صداقت باقی سب کچھ صرف ہیولیٰ

یوں تو ہزار سیانے آئے روح کا دشت بسانے آئے
تیری گھٹا صحراؤں پہ امڈی ابر اُن کا دریاؤں پہ برسا

بت خانے حیران کھڑے ہیں بت تیرے قدموں میں پڑے ہیں
تیرے جمال کی زد میں آکر کیسا کیسا پتھر ٹوٹا

تو نے دیا مفہوم نمو کو ‘تو نے حیات کو معنی بخشے
تیرا وجود اثبات خدا کا تو جو نہ ہوتا کچھ بھی نہ ہوتا

راه گم کرده مسافر کا نگہباں تو ہے
افق باں پر مثال مِہ تاباں تو ہے

تو جو میرا ہے تو میں بے سروساماں ہی بھلا
لِلّٰهِ الحَمد ، کہ میرا سروساماں تو ہے

مجھ کو کیا علم کہ کس طرح بدلتی ہیں رُتیں
جب مرے دشت خزاں پر بھی گُل افشاں تو ہے

اُس خدا سے مجھے کیسے ہو مجال انکار
جس کے شہ پارہ تخلیق کا عنواں تو ہے

اپنے ہر عزم کی تکمیل پر ایماں ہے مرا
پسِ ہر عزم اگر سلسلہ جنباں تو ہے

تیرے دم سے ہمیں عرفان خداوند ملا
نوع انساں پر خداوند کا احساں تو ہے

یہ بتانے کو کہ با وزن ہے انسان کی ذات
دستِ یزداں نے جو بخشی ہے ، وہ میزاں توہے

خاک میں آج بھی ہے گونج ، ترے قدموں کی
اور افلاک کی وسعت میں خراماں تو ہے

تو نے فاقہ بھی کیا ، اپنا گریباں بھی سِیا
اور پھر ذات الہی کا بھی مہماں تو ہے

تیرا کردار ہے احکام خدا کی تائید
چلتا پھرتا ، نظر آتا ہوا قرآں تو ہے

رنگ کی قید نہ قدغن کوئی نسلوں کی یہاں
جس کے در سب پر کھلے ہیں وہ دبستاں تو ہے

میرے نقاد کو شاید ابھی معلوم نہیں
میرا ایماں ہے مکمل ، مرا ایماں تو ہے

روح و بدن میں، قول و عمل میں کتنے جمیل ہیں آپ
انساں ہے مسجود ملائک ، اس کی دلیل ہیں آپ

آپ کی اک اک بات کلام الٰہی کی تفسیر
قرآں تو اجمال بلیغ ہے ، اور تفصیل ہیں آپ

آپ نوید عیسٰیؑ بھی ہیں ، مژده موسٰیؑ بھی
آپ ایثار و وفا کے وارث ، سبطِ خلیل ہیں آپ

آپ کے ذکر سے کھلتے جائیں ، راز جہانوں کے
قدم قدم پر وجود و عدم میں سب کے کفیل ہیں آپ

مکہ و طائف کی گلیوں میں سنگِ ستم کے ہدف
بدر و حنین کے میدانوں میں بطلِ جلیل ہیں آپ

روزِ ازل ، انسان کو خدا نے اک منشور دیا
اور اِسی منشورِ ہدایت کی تکمیل ہیں آپ

ؔکتنے یقین سے بڑھتا جائے آپ کی سمت ندیم
اُس کو کیا اندیشہ شب ، جس کی قندیل ہیں آپ

قطرہ مانگے جو کوئی ، تو اُسے دریا دے دے
مجھے کچھ اور نہ دے اپنی تمّنا دے دے

میں تو تجھ سے فقط اک نقش کف پا چاہوں
تو جو چاہے تو ،مجھے جنت ماویٰ دے دے

وہ جو آسودگی چاہیں ، انہیں آسودہ کر
بے قراری کی لطافت مجھے تنہا دے دے

میں اس اعزاز کے لائق تو نہیں ہوں لیکن
مجھ کو ہمسائیگئ گنبد خضرا دے دے

یوں تو جب چاہوں میں تیرا رخِ زیبا دیکھوں
عرض یہ ہے کہ مجھے اِذن تماشا دے دے

وہ بھی دیکھیں پَسِ ہر حرف تیری جلوہ گری
سب کو تو میری طرح دیده بینا دے دے

غم تو اس دور کی تقدیر میں لکھے ہیں مگر
مجھ کو ہر غم سے نمٹ لینے کا یارا دے دے

تب سمیٹوں میں ترے ابر کرم کے موتی
میرے دامن کو جو تو وسعت صحرا دے دے

تیری رحمت کا یہ اعجاز نہیں تو کیا ہے
قدم اُٹھیں تو زمانہ مجھے رستا دے دے

ؔجب بھی تھک جائے محبت کی مسافت میں ندیم
تب ترا حسن بڑھے اور سنبھالا دے دے

علاج گردشِ لیل و نہار تُو نے کیا
غبارِ راہ کو ُچھو کر بہار تُو نے کیا

ہر آدمی کو تشخص ملا ترے دم سے
جو بے شمار تھے ، ان کو شمار تو نے کیا

اٹھا کے قعر مذلت سے ابن آدم کو
وقار تو نے دیا ، باوقار تو نے کیا

کوئی نہ جن کی سنے اُن کی بات تو نے سنی
ملا نہ پیار جنہیں ، اُن سے پیار تو نے کیا

اگر غریب کو بخشے حقوق لامحدود
تو قصرِ شاہ کو بھی بے حصار تو نے کیا

جنہیں گماں تھے بہت ، اپنی سرفرازی کے
بہ یک نگاہ انہیں ، خاکسار تو نے کیا

دل و دماغ کے سب چاند ہو چکے تھے غروب
یہ وہ افق ہے ، جسے تاب دار تو نے کیا

جمال قول و عمل ہو کہ حسن صدق و صفا
خدا نے جو بھی دیا ، پائیدار تو نے کیا

جب اُن کے نطق کو پہنچی ، ترے یقین کی آنچ
جو بے زباں تھے ، انہیں شعلہ بار تو نے کیا

یہ لطف غالبؔ و اقبالؔ تک نہیں محدود
ندیمؔ کو بھی صداقت نگار تو نے کیا

میں نے مانا کہ وہ میرا ہے تو سب کا بھی وہی
مجھ کو یہ ناز وہ سب کا ہے تو میرا بھی وہی

سر اُٹھاتا ہوں تو افلاک کو مس کرتا ہے
کہ جو محبوبِ خدا ہے میرا اپنا بھی وہی

مثل اُس کا کوئی آیا ہے ، نہ اب آئے گا
میرا ماضی بھی وہی ہے ، مرا فردا بھی وہی

وہ مری عقل میں ہے، وہ میرے وجدان میں ہے
میری دنیا بھی وہی ہے ، مری عقبٰی بھی وہی

اُس کے احکام بھی کلیوں سی چٹک رکھتے ہیں
میرا آقا بھی وہی ہے ، مرا پیارا بھی وہی

وہ جو برسا ، مری تشکیک کے صحراؤں پر
میرے وہموں کی شب تار میں چمکا بھی وہی

کتنی صدیوں سے ہے وہ گنبد خضرا میں مکیں
اور ہر دور میں ” ہر سمت ، ہو یدا بھی وہی

وہ بشر ہے کہ یہی اُس کا ہے ارشاد ، مگر
اس جہانِ بشریت میں ہے یکتا بھی وہی

گرچہ پرکار مشیت کا وہی دائرہ ہے
لیکن اس دائرے کا مرکزی نقطہ بھی وہی

جس کے انصاف نے پتھر کو بھی بخشی ہے زباں
بے نواؤں کی نواؤں کو سنے گا بھی وہی