شاعر: Ahmed Nadeem Qasmi
کتنا سادہ بھی ہے سچا بھی ہے معیار اُن کا
ان کی گفتار کا آئینہ ہے کردار ان کا
ان کو مانگا جو خدا سے تو سبھی کچھ مانگا
کیوں طلب گار ہو اوروں کا طلب گار اُن کا
ان کے پیکر میں محبت کو ملی ہے تجسیم
پیار کرتا ہے ہر انساں سے ، پرستار اُن کا
وہی ، ظلمات کی رگ رگ میں اترتا ہوا نور
میں تو کر لیتا ہوں ہر صبح کو دیدار اُن کا
اے خدا ! اجر کے اعلان سے پہلے سن لے
مجھ کو جنت سے سوا سایۃ دیوار اُن کا
پس ہر حرف وہی جلوہ فگن رہتے ہیں
میری مانند مرا فن بھی وفادار اُن کا