شاعر: Ahmed Nadeem Qasmi
مری حیات کا گر تجھ سے انتساب نہیں
تو پھر حیات سے بڑھ کر کوئی عذاب نہیں
امڈ رہی ہیں اگر آندھیاں ، تو کیا غم ہے
کہ میرا خیمۃ ایمان بے طناب نہیں
ترا گدا ہوں ، اور اس انجمن میں بیٹھا ہوں
جس انجمن میں سلاطیں بھی باریاب نہیں
ترے کمال مساوات کی قسم ہے مجھے
کہ تیرے دیں سے بڑا کوئی انقلاب نہیں
صدی صدی کی تواریخ آدمیت میں
تری مثال نہیں ہے ، ترا جواب نہیں
ندیمؔ پر ترے احسان ہیں اس قدر جن کا
کوئی شمار نہیں ہے ، کوئی حساب نہیں